उत्तर कोरियाले आइतबार वर्ष(सन् २०२६)कै पहिलो ब्यालिस्टिक क्षेप्यास्त्र प्रक्षेपण गरेको छ।
अमेरिकी राष्ट्रपति डोनाल्ड ट्रम्पले भेनेजुएलाका राष्ट्रपति निकोलस मादुरोलाई पक्राउ गर्न आक्रमण गरेपछि किम जोङ उनले पूर्वी सागर (जापानको सागर) माथि कम्तीमा दुई क्षेप्यास्त्र प्रहार गरेका हुन्।
यसले विश्वभर तनाव बढाएको छ।
रोयटर्सका अनुसार दक्षिण कोरियाका राष्ट्रपति ली जे म्युङ चीनको राजकीय भ्रमणमा गएकै दिन र अमेरिकाले भेनेजुएलामा आक्रमण गरेपछि क्षेप्यास्त्र प्रहार गरिएको हो।
ली जे म्युङ बेइजिङ भ्रमणमा छन्, भेटमा सी जिनपिङसँग शिखर सम्मेलन पनि हुनेछ। कोरियाली प्रायद्वीपमा शान्तिलगायत एजेन्डामा छलफल हुने बताइएको छ।
सियोल र टोकियोले क्षेप्यास्त्र प्रक्षेपणको आलोचना गरेका छन्।
दक्षिण कोरियाको राष्ट्रपति कार्यालयले आपतकालीन सुरक्षा बैठक गरेर उत्तर कोरियालाई ‘संयुक्त राष्ट्र सुरक्षा परिषद्को प्रस्तावहरू उल्लङ्घन गर्ने उत्तेजक कार्यहरू’ बन्द गर्न आग्रह गरेको छ।
जापानी रक्षामन्त्री शिन्जिरो कोइजुमीले यी प्रक्षेपणहरूले छिमेकी देश, क्षेत्र र अन्तर्राष्ट्रिय समुदायको शान्ति र सुरक्षालाई खतरामा पार्ने बताए। ‘हाम्रो सरकारले उत्तर कोरियासँग कडा विरोध दर्ता गरेको छ र यसको कडा निन्दा गरेको छ,’ कोइजुमीले विज्ञप्तिमा भनेका छन्।
उत्तर कोरियाद्वारा गरिएको संदिग्ध ब्यालिस्टिक क्षेप्यास्त्र प्रक्षेपणको प्रतिक्रियामा जापानकी प्रधानमन्त्री साने ताकाइचीको कार्यालयले केही निर्देशनहरू जारी गरेको छ।
निर्देशनमा जानकारी संकलन र विश्लेषण गर्न अधिकतम प्रयास समर्पित गर्न, र जनतालाई समयमै र उपयुक्त तरिकाले जानकारी प्रदान गर्न भनिएको छ। त्यस्तै विमान, जहाज र अन्य सम्पत्तिहरूको सुरक्षा सुनिश्चित गर्न र आकस्मिक अवस्थाको लागि तयारी सहित सावधानीका लागि सबै सम्भावित उपायहरू अपनाउनु भनेको छ।
इन्डो–प्यासिफिकका लागि अमेरिकी सेनाले यो घटनाले अमेरिकी कर्मचारी वा क्षेत्र, वा सहयोगीहरूलाई तत्काल खतरा उत्पन्न नगर्ने स्पष्ट पारेको छ। अमेरिकाले यसबारे सहयोगीहरूसँग परामर्श गरिरहेको भनेको छ।
पार्टी कांग्रेस अगाडि किम जोङ उनले सैन्य शक्ति देखाएका हुन्। दक्षिण कोरियाली सेनाले आइतबार बिहान प्रक्षेपित क्षेप्यास्त्रहरूले ९०० किलोमिटर उडान भरेको बताए। जापानले दुई क्षेप्यास्त्र ९०० र ९५० किलोमिटर उडेको उल्लेख गरेको छ।
त्यसअघि ‘उत्तर कोरियाले शंकास्पद ब्यालिस्टिक क्षेप्यास्त्र प्रक्षेपण गरेको छ’ भनिएको थियो।
प्योङयाङले अन्तिम पटक गत वर्ष नोभेम्बर ७ मा ब्यालिस्टिक क्षेप्यास्त्र परीक्षण गरेको थियो। शनिबार, किम जोङ उनले हतियार कारखानामा रणनीतिक निर्देशित हतियारहरूको उत्पादन दोब्बर बढाउन आह्वान गरेका थिए।
हालैका हप्तामा, किमले हतियार कारखानाहरू र आणविक पनडुब्बीको भ्रमण गरेका छन्। पार्टी कांग्रेस अगाडि क्षेप्यास्त्र परीक्षणहरूको निरीक्षण पनि गरेका छन्। एजेन्सीको सहयोगमा
